ابيات ابو ذيه 2
ذهب صافي دقش ما بيك و دراك
او دريتك حيل صاحب نظر و ادراك
شريكي بل فرح يا صاح و دراك
اصل طيّب او صاحب كل حميه
***
اريدك وفي او كل وكتي اجيلك
او زيل الغيض من گلبك و جيلك
اچم مرات ازورنك و اجيلك
لاكت ما تمر مره عليه
***
يهل ناديت بسمي ارجوك عيده
يلماخذ دليلي اوياك عيده
الگلب مومن خلص رمضان عيده
اصل العيد من نفرح سويه
***
افكر بيك يا صاحب ولا نام
ولا غمض جفن عيني و لا نام
احبن اگعد اگبالك و لا نام
عزيز او شوفتك حصره عليه
***
بگيت ابعهدي وياكم ولا خون
تعديت ابدرب محسر ولاخون
لجلكم گلب ما ضل لي و لا اخوان
ابحيل الله او جمعكم فرحه اليه
***
انه انتظر جياتك و مرّك
احب گعداتك الحلوه و مرّك
رجاء گلي متي تفرغ و امرّك
اريد اجمع دموع الحب سويه
***
اريدك مثل ماضيك وفينه
تحضرنه ابفرح وابهم وفينه
انه وياك كل شجره وفينه
تجلس تحت ظلنه اهل البريه
***
يغالي اشلون ما احبك ولا بيك
ولا امك تحن مثلي و لا بيك
عساهن بيه لوعاتك ولا بيك
واحول كل الم منك اليه
***
اذا خانك زمانك انته اخينه
صحنه ابصوت بسمك و انته اخينه
لان احنه اخوتك و انت اخينه
و اعز منكم ابد ما وجد ليه
***
وحگ الما خلف قوله و عيده
احب رمضان واصيامه و عيده
اليوفي دوم اخــدمنه واعيده
و اصيرن له جـــسر يعبر عليه
***
شكرت الرب بخوتي من لمتنه
العدو جوّر اضعونه من لمتنه
اذا يسمع الواشي من لمتنه
انتظرنه ابلحظه ما تبقي خويه
***
وحگ روحي التحبك و التهابك
لچن بعدك حرگني و التهابك
هايم بيك عگلي و التهابك
چذب مثلك عزيز ايصير اليه
***
ابگلبي اجروح من هجرك و الف طر
او عگبك زاد ما لذلي ول ا فطر
اضل طول العمر صايم ولا افطر
افطر من حظر شخصك اليه
***
الخوه اوياك وسط الگلب تنظم
و الك طول العمر طيبات تنظم
السوالف و الذكر بس الك تنظم
لانك اخو راعي الموزميه
***
يحال الظيم حالي شرده منه
او لفاني الشيب ماكو شرده منه
الخوا لو باشراني شرد منه
اريدن شوفته او يسئل عليه
***
يهل تحسب نجوم الليل عدنه
الفرح بجفاك مرنه او بات عدنه
غلاتك يا حلو تدري اشكثر عدنه
تساوي الروح يمدلل عليه
***
اريدك ضخر تنظم لل كلافات
او جسر تعبر عليه بل كلافات
اذا فاتتك لحظه بل كلافات
اجبرها او لا تضل مطلوب اليه
***
حسبنه انجوم او نجمك شع علينه
عزيز انته يغالي شع علينه
ابغيابك يا ترف هجرك شع علينه
ابطن گلبي و احس اتعن عليه
***
ابجفاكم ما سكن دمعي و لا هاد
ابفگدكم ناح ابو......ولا هاد
يون ونت ونين الون ولا هاد
يهيد ابيوم تجمعنه الدنيه
***
كف عنّي لا تذكّرني بهالاي
ولا تنبش گلب جافي بهالاي
لون ليلي لجل هجرك بهالاي
تنشف ادموع عيني بس اذيه
***
الدهر كل يوم يولمني او يجرني
ابوجوده اتبعدت عنه او يجرني
اجرنه او يعض شفته او يجرني
او خلاني وحيد ابهل دنيه
***
الزمان اشعجب ما غير طبع بيك
او تظل تنشد علي احبابك طبع بيك
الكرم والجود والغيره طبع بيك
واريد الله يحفضك دوم اليه
***
الدهر ما لوا غيري بس لواني
او كصر ضلعين مني بس لواني
اگله انه رفيجك بس لو اني
احطمك مثل ما تضغط عليه
***
اسنين العمر مرن فرد مره
ما شفت الفرح بيهن فرد مره
لون اتمر علينه فرد مره
ارجع شاب من نگعد سويه
***
اشلون اوياك اعديهه بلا شوف
هجرك سكر اعيوني بلا شوف
يمن كلمن فتن بينه اببلا شوف
يشوف الضيم دنيه و اخرويه
***
بسك لا تجر ونتك ولا اريد
عشرتك ضيگت صدري ولا ريد
الماي الصافي اعوفنه ولا ريد
اريد اسكن ابحي ما بيه هويه
***
يدنيا بسچ او زلزل تمطرين
بعد ما احمل افراگچ تمطرين
ذبت من هجر دلالي تمطرين
امطري صخر لو تحت الوطيه
***
انفجر دلال گلبي من بعد كم
وحيد اصبحت غصبن من بعدكم
عسا لا طال عمره من بعدكم
اتمني ايمر هواكم هسه اليه
***
بنيت اقصور من هجرك و داويت
ابضچرك فجرت گلبي و داويت
دوا الما طيب الفرگه و داويت
اداوي جرح غيره ايصير بيه
***
يهيعونه السكن دارك و زارك
او شم ريحت هوا نفسك و زارك
اذا طال العمر بعدك و زارك
حطني ابطن گلبك مُنيه اليّه
***
دريت الدهر عاداني و حسباي
اشما ارد اوصل اگبالك و حسباي
عجيبه يدري ابطبعي و حسباي
متي يتركني و اوصل لك فديه
***
تاهت دروب الهوا او ضلت دروب العسر
ماتت جموع الصفا او باتت سروب العسر
يا حسفه يا خوتي تايه ابدرب العسر
ديچ الصبح من عوا وحدي اصبحت بل بله
***
الحميه طبع بلزينين او عنوان الحميه الدم
واذا حشمت يوم الضيج ما يتعذر ابن العم
ماجود او وفي تلگاه او بحزام الوفه امحزم
و اسلاحه امعلگ بچتافه
***
الحميه الغيره يا هل ناس دم يجري ابشراييني
اذا تعتذر يبن الناس چا المن تخاويني
انه اوياك متوسد ابطن گلبك دخليني
جيدومه علي العدوان فداك اشمالي و ايميني
ما ارجع لو ينگص راسي
***
انه اوياك لل تالي ولا مل
ابگلبي انرسم تصويرك ولا مل
اذا اشيلك فرد شيله ولا مل
امل ابيوم تفرگنه الدنيّه
***
ادور عل وفي واهله وربعه
او شد حبل الوصل بيهم وربعه
الگلب ديوان سويته و ربعه
او فرشت افراش لل بيهم حميه
اذكرك من تشد حبلك و ربعه
علي الي ترك خوانه و ربعه
گلتلك سير ويانه و ربعه
اخير امن الثلاث ابهل وطيه
***
خل روحك علي روحي او شوف اشلون احبنك
اذا عينك تنام الليل بعيوني احرسنك
حرت وياك يل غالي گلي وين اضمنك
بعيوني اخاف ابچي و ادموعي يدمرنك
***
الك گلبي يحن بس الك بل ذات
لان طبعك جميل او موش بد ذات
تضل بلروح عايش دوم والذات
اشلون انساك وانت روح اليه
***
اخوي الزين اقدرنه وافيله
اوگف بل شمس لجله وفيله
شط النيل اعبرنه وافيله
واصيرن جسر خل يعبر عليه
***
اخوي الزين اقدرنه واشيله
ابوكت لو مال بيه وكته وشيله
اذا خانه الدهر خادم و شيله
مملنه ابد لو خان بيه
***
دمرني الوكت من بعدك ومرني
تناولت الاكل حنضل و مرني
تعال ارجوك لدياري و مرني
ولو بل باب بس انشد عليه
***
الصداقه عشق لل طيبين ماي او تزهي بل وديان
امن اتذوقه عسل تلگاه او بل ضيجه سبع ميدان
انته ورد من شتليت واليشم الورد سكران
والصحبه اتريد الباراها
***
الخاين من يخونك و انته اخونه
او بس حشم يصاحب و انته اخونه
عزيز انته او صديقي و انته اخونه
يظل هذا العهد للموت بيه
***
فتحت الباب لل خوه و ما جيت
ندبتك صير مصدرهن و ما جيت
اشعجب بل عيد عايدتك و ما جيت
اظن بل گبر ما تحضر اليه
***
امغيم ما مطر غيمي ولا نم
الوج او للصبح واعي ولا نم
شهم يلما حچه الباطل و لا نم
وفي مثلك ملك غيره و حميه
***
يزول الغيم مني من شفتكم
اعزاز انتم عليه من شفتكم
لو بيدي اسكن اوياكم من شفتكم
واطيب الگلب من سكته قويه
***
تصح كلمه بخت تفرش دواوين
او يصح ديوان ما يفرش حصيره
او تصح كومت زلم ما تسوا فلسين
او يصح مثلك شهم يسوا عشيره
***
مو خوت شمس و ايمر عليهه الليل
عاين بلنهار او نجمه تلگاني
ولا خوت سفر او نتفارگ انه اوياك
خوت موت و انت اتصير دفاني
***
يلي اتگول احبك اعرف اشما اتگول
لان گلبي يدگ كل لحظه ابضچرك
ما ناسيك لا والله وحگ احسين
اخاف الموت يلهمني و انه ابفكرك
شد احزام ظهرك اوبل عجل ردتك
لاكن طوّعاك الما عرفنا اسباع
زادانه حطب لل نار من تهلك
***
اذا انته تون و اتنوح انه الليل ما نامه
اذا انته جرح مجروح روحي اجروح مليانه
اذا انته خلص صبرك روحي اعليك خلصانه
اذا عينك تصب ادموع انه اعيوني عميانه
***
الك حافي الجدم يا زين عناي
والك ممنون تسئل يخي عناي
لون تامر عليه طبگ عيناي
او حتي الروح اقدمهه هديه
***
البيرق هل يرفرف و انت وينك
بسم حسان هوس و انته وينك
انجمعنه الكل يغالي و انته وينك
التحگ ميفيد تعطولك اليه
اريدك تدخل ابگلبي او تشوفه
ابحماسه انظر ابمضمونه او تشوفه
جمعكم يهزم الحاسد تشوفه
يظل تذكار لولاد الحميه
***
اخيك و افتخر بسمك و اناشد
او دهري اشما يدگ يجرح و اناشد
دوم اسئل عله اخبارك واناشد
وافرح دوم من تنشد عليه
***
ابسماك افتر عشر تشهر ولامل
او سهرت الليل بفراگك ولا مل
اذا مل السمچ مايه ولامل
دعرّفني وادزلك هديه
***
تذكّرني علي الفرگه واجيلك
حافي اتعنه لديارك واجيلك
ابوجبه ادعيني اتمنه و اجيلك
مو بس من بِعد تدّلل عليه
***
اعيوني اعليك يجرن دمع يصفن
حلو لايج عليك الوصف وصفن
دليلي اشما يمر طرواك يصفن
عزيز ابخاطري او مبعد عليه
***
عليك الله تعرفني من اسماك
ترا گلبي انفطر گلي من اسماك
احبن اگعد اگبالك ونسمك
تسكر من تشم ريح الخويه
***
دخل بيبان گلبي حبك انه
دخيلك من هو انت حبك انه
اذا تقبل يطارش حبك انه
دعلمني شعلت النار بيه
***
الك روحي رهينه بل عشگ حطيت
او بجفوني فرشت البيت لل جاني
هم تدري اموتن صگ لو سمعيت
بيك امبدل العشره او تنساني
***
اشعار متنوعه
عاتبني لو حسيت لحظه انه ناسيك
يلتسري بين اعضاي بگليبي اخليك
***
علي اهموم المحب سهرنه الگلوب
او علي نور الصبح مشينه حبنه
او تعلمنه البچي و الدمع والنوح
او شتلنه الطيب بدروب اليضدنه
او دزينه الفرح بجناح الطيور
الك يا زين نهديلك گلبنه
محبوب العشگ مو كلمه تنگال
ولا چلمت حبيبي هينه عدنه
كثير الناس حبها بس بل وجوه
و احنه بل چبد خضر عشگنه
***
ارحلنه اوسكنه ابعيد و اصبحنه غياب
بس طبع بينه انموت او ما ننسا الاحباب
***
دعوه العريس
يدعوا العريس بيوم عرسه
كل الاحبه والاخوان تجتمع
في حفل زفاف يكون مكتمل
حضور الاحبه واهله يتبا شر
اهلا وسهلا بكم سيداتي وسادتي
وحضوركم لنا سرورا وفخر
ذكرناك في الافراح يا مهجتنا
ونحن لكم شكرا جزيلا نقدم
نكمل احتفالا زاهرا كنا نرجاه
عبر السنين ننطق به فارتسم
يا ليت كل شباب يوصل امله
ولا يبقي في الافكار متدهور
نرجوا من الله ان يجمعنا
في حفل زهت به الفرحه
اهلا وسهلا فيك جيت ابفرحنه
نشكر قدومك دوم يل غالي عدنه
***
دردش وارد اعليك يا اغلي ناسي
كل الخلگ عل گاع و انت اعلي راسي
***
عتاب مع الزمان
مليت من العتب والزمن سد بابي
يا دهر بسك بعد كف واسمع اعتابي
ضليت وحدي فرد چني ابگصب رابي
محد سمع صيحتي شيبت بشبابي
چندوب اجرن واون بلقلم واكتابي
ملوني حتي الاهل او لاموني اصحابي
وين انتچي اليامحب عافوني بمصابي
صب الدمع علي وجن نهران جرت وجر
من كثر هم العلي ليلي ونهاري اجر
صوتي نبت بل صخر گلب الصخر ون وجر
جرار سقطت مطر اصخور الدراري هنه
دولاب كردس علي من ثگل الحمايل هنه
احمول الشلتهه جمع اسبابهن هن هنه
اتواعد الهن وكت يصفه الزمن يا هنه
واتواخذ الثار بصواب الجرحني جرح
ما طاب مني الالم واتغمگ علي الجرح
جراحي مو من هلي من اهل المقابل جرح
لابد يجي يوم او نتلاگه ابدربنه سوه
حاجوز ما ينشرا من بعد المشابگ سوه
اضمك بل الگلوب والوي ارويسك سوه
واتشوف الفراگ اشگد اثر عليه شرك
يا بد وفا ليش ناسيت المعاشر شرك
ما گلت مخلوق واتنادم عليه و الشرك
واليظلم الناس اهون هم عليه بل شرك
دوم انطر او شوف كل مظلوم صوته وجر
***
ذكر الاحباب
حطيت بعيوني ملح بس ردت انسه احبابي
احباب الجفوني ا بلا ذ نب الله يا غيابي
هم تدري لو بعد القرب يتغرب الي رابي
مليت منك يا قدر روح او بعد لترابي
فات الوكت والعمر ما تسمح الخاچيه
يا بد وفه مر بيه واحچايه المنسيه
جيه انتظر لك جيه واعتذر من باجيه
***
گلبي انجسم ثلثين اتمنه اشوفك
هم تنتظر انساك هيهات اعوفك
***
لو ادري هذه الطيب كله ابگلبكم
من هزت الكاروك چا ما عفتكم
***
اريد ابشوك تذكرني اوعلي فرگاك تعذرني
مو بيدي ابتعد عنك بس الوكت يجبرني
***
تمطر صخر واحجار او ترعد مصايب
الدنيا هيچ اوياي من انت غائب
***
ماريدك بعد ماريدك
ماريدك ولا اريدن اشوفنك بعد يهواي
انته اجرحت گلبي دوم حقيقه انته سبب بلواي
مليتك دكف عني ولا تنظر بعد ملگاي
نصيحه ما تفيدك ليش اشما تمرگ گلت هل جاي
روح او خل دليلي اهناه مطروح اعلي شاطي الماي
اشما ينزل علي خله دخليني يبعد اچلاي
دار الفرگه تبگه اعزاز او دار الموطنه بحشاي
كف مني انه مليتك ماريدك بعد ماريدك
ليش الجوجي يبن الناس من گتلك تفارگنه
او علي كل سده والصار تصافينه او تهاجرنه
جنسي اوياك ما ياكل وانته تدخل ابحدنه
چومت حچي عندي اوياك اذا اگولن تباعدنه
الحسافه بعد وين اتفيد ليش انته تعاندنه
ظل ابهل ظليمه دوم بخلاقك تهددنه
كف مني انه مليتك اذا ناديت ماجيتك
ماريدك بعد ماريدك
بعد عندي عتب ويه الزمن وانته يطرگاعه
الخلاني فريسه الكل نذل ما يهتم ابگاعه
من زغري اون من هل وكت ما بدّل اطباعه
دوم امحزم ابجيشه امعذبني
ما شفت فرحه ليش تقبلني ولا ساعه
امچردس علي كل اهموم من اهلي
او عمامي او حاطني ابهيمه امفرگعني ابفرگاعه
لو تسمع ونيني ابلليل تگول ابحضي عذريتك
كف مني انه مليتك لتگلي انه عذريتك
ديوان البخت
يديوان البخت افرش مضيفك زين
او لم خيرين اهل الخلگ هل ساعه
او خل تتشاور اهل الفكر عين ابعين
علي الي ما يسد بابه من اطباعه
او خل يدرون چم عورات هين ابهين
منسيه الطلايب بس ذكر گاعه
شنهي امدلعات ابسوگ جين ابجين
يتمايلن تحت الثوب وارباعه
بس هل حيل ويه اخوك يا بوحسين
اصبحت مغلوب من وحده ام گباعه
اشما تامر تگلهه انه عد عيناچ
امسلح بل فشگ حاضر ابكل ساحه
رسوم الغرب دخلت بل ابيوت البين
ماهواره او كذا ديكور دلاعه
ماريدك يخي لو تنتسب لل شين
او تنسي ارسوم ربنه او علي واتباعه
مو مسلم ولا عربي ابد ما اسميك
خلف الجنبي او واگفله بل ساحه
ادعي با لخير لما تشاء
اهدي الفرحه لمن بلعوهه منك
حب الگلوب التكرهك انسه چنك
ادعي للي چردساك اببير الاسود
صير كل شجره قوي او لف اليطبرك
خل تنام او قادهم يعمن عسنك
هل ربيع الجاي يمنه ابضحك سنك
الله يدري والغريب اشما يريد ايگول عنك
او خل تنام اوحوشها اوتلعب امشنگ
اشتل اورود المحنه ابگلب الاسود
وسع ابصبرك او كثر كل بحر واسع ابفنك
لا تسد ادروب تدخل لل كرامه
انت اهل المرحمه او ديوانه او ختامه
اشما تزغر الروح تكبر غيرتك يبني ابشهامه
الاحترام الله و اكبر حرمه الدين او قيامه
والتكبر صخر ثگله والغبي ايحصل المهانه
والعلم شمس او مضويه ابگلب من يرحم عمامه
آه من جور الاناس الما تعرف الله او بس علامه
يمشي بس لابس فخور او داخله اتراب الغمامه
يمرح ابمشيه لچنه خالق الكون ابسهامه
بسك انته يبن ادم من زغر شكلك ضعيف
اوبل كبر انتظر محشر لل يكرمك بل مضيف
عاشر ابمعشر الخوه او ليّن الگلب المخيف
شير من اهل الدراسه او لا تخالط كل نحيف
الروح من تصعد او يرجع نفسك الرب الشريف
راح تلگاها الغضيه ملف صادرلك لطيف
الچان عامل خير يبني گبرك ابواسع خريف
والظلم ما دام لحد او ما دخل گلب النظيف
اوصيتي عينك من عروض الناس جمعا
الناس عدهه اعيون تتباشر ابكيف
مثل ما تبني بنايا ابدنيتك قصر الظريف
كون لاخرتك سموح او عامل اهل الخير تلگه
اوساسها ابجنتك رديف
اهل الضمير
اذا يقبل ضميرك عوفني او روح
انه امعلم انام الليل بل ون
بچيت او ما لگيت ادموع بل عين
اخاف ايمر وكت وانت اتتالم
سهرت الليل لجلك وانته مرتاح
ما تدري ابعذاب الگلب من جن
بسك لا تعذبني الصبر فاح
كتلني اللوم و اگليبي تسودن
بعد يمته تجي و اتضوي البيت
بيتك بل گلب مبني ابمعدن
تعال او شوف گمرا الدنيا يل جيت
تعجب لو دخلت الباب تحزن
تتوسف علي اطباعك يمهلوك
تلگاني احبك هسه تندم
الدنيا اشلون اوصفها ابصباها
هلا ابشيابها او مهلا صباها
مسيح او مسلم و ايهودي او صباها
كل واحد شكل يدي التحيه
***
توجّه لليكرمك و انتخيله
اذا يدعيك لبي و انتخيله
اشماون لل زين امدحه و انتخيله
اليوفي بل عهد ساوا الخويه
***
تمنيت العمر لل بشر بل كيف
اذا مسه الهجر يبتعد بل كيف؟
العگل مفتاح للشر دونه بل كيف
اذا عندك صبر الدنيا زهيه
***
يهادي بسك ابجيتك هدينه
اچم طالب علم لجلك هدينه
احنه الي رب العزه هدينه
نعيش ابهل وطن نعمل سويه
***
تعال او شوف چم طارش اجاليك
احبك و اگعد اگبالك و اجاليك
اذكرني اه يمحبوبي و اجاليك
بلكت ندفن العبره ابزويه
***
تكور علي هم زايد و ناقص
العدو مدّد لي شناطه و انا اقص
اكره عشره الكاذب و ناقص
عاشر كل شهم يسوا الخويه
***
ابو اعيون الكحيله سالمني
معاه خشفين مرن سالمني
ابجفاه الدمع علخد سالمني
مشه او گلبي خذاه وياه اذيه
***
خل خلّك ابسرك لاتگله
اذا طالعته يمه لا تگله
الصنم و الغنم لات و گله
تصير انته صنم لل ابدويه
***
ملكاني زماني عده اسنين
او خلاني صره صخره ابطن طين
مليته او طرت لديار الابعاد
لزماني الدهر ويه المجانين
***
الخوه اتريد سيرتها و حدها
الوفاء و الصبر و امباشر و حدهه
تعلّم كل انس انته و حدهه
تفوز ابدنيه بيهه و اخريه
***
مثل عباس ماكو اخو ينسام
ابذكر احسين گلبه دوم ينسام
حسافه كل عجيد الگوم ينسام
الحيايه اتموت بسموم الخفيه
***
العلم شمعه يضي دربك و جارك
اذا خان الدهر صانك و جارك
يذكرك خالقك دينك و جارك
الما يكسب علم عاش اباذيه
***
الشاعر جاسم ثعلبی ملقب ب (الحسّانی) والدی محمد جابر الحسان سلیماوی ساری الاصل و النسب ولدت فی قریة العمه من توابع مدینة الخفاجیه قاطع شط النیسان موالید اول ربیع 1981 نشات فی القریه و قروی و احب الریف و اطواره المدهشه و تعلمت ما تعلمت تبعد قریتی عن هور الحویزه بضع کیلو مترات ثم بسبب نشوب حرب هاجرت مع العایله الی رامز ثم الی مدینة الاهواز قرات فی القریه الی خامس ابتدایی و فی الخفاجیه الی دیپلم بفرع الثقافه و الادب اخذت رتبة بکلاریوس فی مدینة الاهواز ثم عملت مدرس و و بعد ذلک تقاعدت و فی الحال الحاضر امارس الشعر و الادب و کل ما اراه ارسمه فی لمحه ادبیه و الحمد لله رب العالمین علی ما اعطانی من موهبه و توفیق و اشکر ممن ساعدنی علی نشر و طبع کتبی و اشکر القاری و القاریه علی بذل وقتهم لتحمل شرار نبذات اشعاری و الشکر لکم واصل. داعیکم جاسم ثعلبی (الحسّانی)